Profesori i sociologjisë së religjionit, Ardian Gola, ka thënë se që nga paslufta Kosova është shndërruar në shoqëri fetarisht indiferente.
”Vlerësimi im sidomos në Kosovën e pasluftës dhe tutje, për mua vlerësimi më korrekt, më i saktë për këtë shoqëri është se jemi shoqëri fetarisht indiferente, në kuptimin që nuk është i angazhuar praktikisht në ushtrimin e riteve, nga paslufta e tutje këto statistika që po na i prezanton Adriatiku duhet të mendohen në trajtim krahasimor, duhet të shihet metodologjia e prodhimit statistikor”, u shpreh Gola në Rubikon me Adriatik Kelmendin, njofton klankosova.tv.
Duke folur për Rilindësit dhe lidhjen e tyre me religjionin, Gola tha se ata kanë folur për identitetin kombëtar, pasi e kanë kuptuar rrezikun që u vinte shqiptarëve nga jashtë.
”Elita fetare ka qenë edhe elitë kombëtare, është e natyrshme që prej një elite që ka derivuar në një kontekst të caktuar kohor të shkollohesh fetarisht, sepse edukimi ka qenë fetar, te Rilindësit e shoh një diagnozë sociologjike dhe një projeksion sociologjik”.
”Sepse ata kanë strategjizu me përkatësitë dhe me identitetin, ata e kanë kuptuar rrezikun, që në fakt është rrezik sociologjik kur t’i natyrshëm në çdo shoqëri ndihesh i kërcënuar ose rrezikuar nga jashtë edhe nëse ke dallime nga brenda ti e gjen mënyrën për t’i neutralizuar për ta gjetur të përbashkëtën, kështu që ne në një situatë të rrezikut dhe kërcënimit nga jashtë si shoqëri shqiptare që ka qenë permanent, ta zëmë tash armatimi i Serbisë, ose rreziku i eskalimit në Ukrainë, krejt këto janë parametra që ti sociologjikisht fillon dhe mendon, cili është themeli që ty të përbashkon dhe cili është ai që të ndanë?.
”Sigurisht që të përbashkëtën ke me e gjetë në gjuhë dhe komb, por kjo nuk do të thotë që ne përmes një projektimi të tillë t’i ndrydhim identitetet me të cilat njerëzit e ndejnë sigurinë e vetë psikologjike dhe ontologjike, por thjeshtë ta bëjmë me dije njerëzve që nevoja për ta ridefinuar dhe për t’u ripozicionuar në aspektin fetar që të krijohet kohezion social nuk është armiqësim me njëri-tjetrin”.
”Pra shqiptaria, kombi është sot themeli më i sigurt që garanton një kohezion social të këtyre banorëve”, tha Gola.
