Ekipi i të rinjve të Kosovës do të marrë pjesë në Festivalin Olimpik Veror Evropian të të Rinjve (EYOF) Banska Bistrica, i cili do të mbahet nga 24 deri më 30 korrik 2022 në qytetin e Banska Bistrica, Sllovaki. Dhe është prizrenasi Salidin Rama ai që përfaqëson Kosovën në tenis transmiton Kosova.info.
Vlen të theksohet se ylli i ri në ngritje nga Prizreni, i cili përfaqëson Kosovën dhe federatën kombëtare të tenisit Kosovës në Festivalin Olimpik Rinor, është 13-vjeçari i talentuar Salidin Rama i cili vjen nga TK “Prizreni”.
Ndryshe, ekipi i Kosovës përbëhet nga 13 sportistë nga shtatë sporte të ndryshme. Atletika fillon me tre garues, xhudo, noti, tenisi dhe badmintoni kanë nga dy, dhe çiklizmi dhe gjimnastika artistike nga një pjesmarrës.
Në EYOF marrin pjesë sportistët e moshës 15-18 vjeç. Banska Bystrica 2022 ishte dashur të mbahej verën e kaluar, por u shty për një vit për shkak të pandemisë Kovidit dhe shtyrjes së Lojërave Olimpike në Tokio 2020. Përveç ekipit, Kosova do të përfaqësohet në EYOF edhe nga tenistja dhe gjyqtarja Bljearta Ukëhaxhaj, e cila do të jetë në cilësinë e ambasadores së re olimpike, e zgjedhur në kuadër të programit për Ambasadorët e Rinj Olimpik Evropian (EYOA).
Për Komitetin Olimpik të Kosovës, EYOF-i i tanishëm veror është i katërti, pas përfaqësimit në Tbilisi 2015, Gyor 2017 dhe Baku 2019.
Deri më tani, KOK ka vetëm një medalje të fituar në EYOF, me atletin Muhamet Ramadani në Baku 2019, i cili kishte fituar të artën në hedhjen e gjylës.
Presim shumë rezultate dhe medalje të shkëlqyera dhe i urojmë përfaqësuesve tanë shumë suksese gjatë pjesëmarrjes në Festivalin Olimpik Rinor. Po ashtu kemi bërë përpjekje që t’ju informojmë për detajet e turneut. /Kosova.info.
