Në mjediset e Kazermës “Adem Jashari” në Prishtinë, sot u zhvillua një ceremoni festive me rastin e 8 Marsit, Ditës Ndërkombëtare të Gruas, përcjell Kosova Post.
Në shënimin e kësaj ditë të veçantë, të pranishme ishin gra dhe vajza ushtarake të FSK-së, veterane të UÇK-së dhe TMK-së si dhe zyrtare të MM-së.
Në këtë takim të pranishëm ishin Ministri i Mbrojtjes, Armend Mehaj, Drejtoresha e Departamentit të Financave në MM, Fahrije Sadiku, Shefja e Njësisë për të Drejtat e Njeriut dhe Barazi Gjinore në MM, Halime Morina, kolonel Arife Halili, major Mimoza Budeci, si dhe zyrtarë e ushtarakë të lartë të MM-së, FSK-së e Ekipit Këshillues dhe Ndërlidhës të NATO-s (NALT).
Gratë dhe vajzat e pranishme në këtë ceremoni i përshëndeti Ministri Mehaj, duke vlerësuar lartë kontributin e grave dhe vajzave zyrtare e ushtarake në Ministrinë e Mbrojtjes dhe FSK në. Më tej, Ministri Mehaj tha se muaji mars për kombin shqiptar ndërlidhet me qëndresën tonë për liri dhe se në këtë vend kontribut të pa çmim kanë dhënë gratë dhe vajzat pasi që: “kur bëhet fjalë për atdheun zhduken dallimet gjinore”.
Më tej, Ministri Mehaj tha se gratë janë vlera e shoqërisë sonë dhe duhet të konsiderohen si të tilla, prandaj theksoi se bashkërisht duhet të punojmë që të ofrojmë mundësi për zhvillim e avancim të grave në shoqërinë tonë, e sidomos në fushën e mbrojtjes dhe sigurisë sepse mbrojtja dhe siguria janë detyrë e të gjithë qytetarëve.
Gjithashtu, me këtë rast, nga Shefja e Njësisë për të Drejtat e Njeriut dhe Barazi Gjinore në MM, Halime Morina dhe Mimoza Budeci, major në FSK, u shtjelluan temat “Gratë në MM/FSK- Perspektiva dhe Barazia Gjinore në MM/FSK si reflektim për të kontribuar më shumë”, si dhe “Rrugëtimi i një pjesëtare të FSK-së”.
Në shënimin e Ditës Ndërkombëtare e Gruas, Ministri Mehaj dhe delegacioni MM-së dhe FSK-së, gjithashtu bënë nderime tek Memoriali “Heroinat” në Prishtinë.
Dita Ndërkombëtare e Gruas, gjatë ditës do të shënohet edhe me aktivitete tjera.
