Në Komunën e Mamushës në Kosovë u mbajt “Festivali Ndërkombëtar i Domateve”, transmeton Kosova Post.
Në festival, i cili u organizua për herë të 14-të këtë vit nga Komuna e Mamushës, morën pjesë kryeministri i Kosovës, Albin Kurti, ministri i Zhvillimit Rajonal dhe kryetari i Partisë Demokratike Turke të Kosovës, Fikrim Damka, ambasadori i Turqisë në Prishtinë, Çağrı Sakar, kryetari i Komunës Bağcılar të Istanbulit, Abdullah Özdemir, deputetë të Kosovës dhe Türkiye-s, kryetarë komunash, përfaqësues organizatash dhe shumë të ftuar.
Duke folur në ceremoninë e mbajtur në oborrin e Shkollës Fillore Ataturk në Mamushë, kryeministri Kurti tha se sektori kyç për zhvillimin e Kosovës do të jetë bujqësia.
Ai u shpreh se do të vazhdojnë t’i mbështesin bujqit në Mamushë, e cila është cilësuar si hambari i Kosovës.
“Komuna e Mamushës është pjesa e mozaikut që plotëson dhe i jep vlerë të shtuar bujqësisë në Kosovë, duke qenë një shembull që duhet ndjekur nga të gjithë. Vullneti dhe përkushtimi për ta punuar tokën sjell si rezultat prodhime cilësore dhe kjo është çka e karakterizon Mamushën”, tha Kurti.
Ambasadori Sakar, nga ana tjetër, shprehu kënaqësinë e tij për mbështetjen e dhënë zhvillimit të Kosovës nga populli Mamushës, të cilin e vlerësoi si punëtor dhe produktiv.
“Një nga faktorët më të rëndësishëm që i bën të vlefshme marrëdhëniet mes Türkiye-s dhe Kosovës është padyshim prania e bashkëkombësve tanë nga Kosova dhe vëllezërve tanë në Mamushë. Dëshiroj t’ju falënderoj të gjithëve që keni përfaqësuar komunitetin turk në atdheun tuaj në Kosovë dhe keni kontribuar me sukses për paqen dhe prosperitetin e Kosovës”, deklaroi ambasadori turk.
Pas fjalimeve, makina bujqësore iu shpërndanë më shumë se njëqind fermerëve. Festivali u mbyll me shfaqjen e valleve popullore dhe një koncert të vokalistit Orhan Çakmak.
Në kuadër të festivalit u nënshkrua një protokoll ndërmjet komunave Bağcılar dhe Mamushë për rritjen e mëtejshme të bashkëpunimit./AA
