Kryetari i Komunës së Drenasit, Ramiz Lladrovci, e ka postuar një fotografi në Facebook ku shihet duke ecur sheshit të Prishtinës së bashku me kryetarin e BDI-së, Ali Ahmeti.
Për mysafirin ai u shpreh se së bashku bartin kujtimet e jetës së tyre rinorë, ndërsa tani kanë përgjegjësi për të punuar në të mirë të qytetarëve.
“Vëlla Ali, rrugët e sheshet e Republikës, bartin përgjithmonë kujtimet tona të ditëve më të çmuara të jetës tonë rinore, për liri, për çlirim. Sot, bartim mbi supe përgjegjësinë institucionale por edhe amanetin e dëshmorëve tanë, për të bërë më të mirën për fuqizimin e subjektivitetit nacional e qytetar në rrugën tonë euro-atlantike. Vëlla Ali, Kosovës i jep hijeshi!”, shkroi Lladrovci te përshkrimi i imazhit të postuar.
Ahmeti mbrëmë ishte prezent në Kosovë, ku mori pjesë në promovimin e librit të Enver Hoxhajt “Përplasja e Madhe”.
