I dërguari special i Bashkimit Evropian për dialogun Kosovë-Serbi, Miroslav Lajçak, mbrëmë ka takuar ambasadorët e huaj në Kosovë dhe ka mbyllur vizitën dyditore.
Lajçak, pas mesnate, ka bërë të ditur se komunitetin ndërkombëtar e ka informuar për hapar e ardhshëm dhe pritjet për dialogun Kosovë-Serbi, njofton Klankosova.tv.
Mes tjerash, emisari edhe i ka falënderuar për interesimin dhe mbështetjen në këtë proces.
“E fundit, por jo më pak e rëndësishme, e informova Komunitetin Ndërkombëtar në Kosovë për gjendjen e dialogut, hapat e ardhshëm dhe pritjet tona për ditët dhe javët në vijim. Mirënjohës për interesimin dhe mbështetjen e tyre”, ka shkruar Lajçak në Twitter.
Kujtojmë se Lajçak në ditën e parë të vizitës ka takuar presidenten e vendit, Vjosa Osmani dhe kryeministrin, Albin Kurti, para takimit në Ohër ku pritshmëritë janë që të dakordohet mbi udhërrëfyesin e zbatimit të Propozimit Evropian për dialogun Kosovë-Serbi.
Ndërkaq gjatë ditës së djeshme ka takuar edhe krerët opozitarë ku mori qëndrimin e tyre për propozimin.
