Lituania ka ndaluar importin e gazit natyror nga Rusia dhe do të jetë në gjendje të mbështetet në furnizimet nga vendet e tjera për të përmbushur nevojat e saj për energji.
Lajmin e ka bërë të ditur presidenti i vendit të shtunën, duke thënë se masa ishte një shembull për anëtarët e tjerë të Bashkimit Evropian, shkruan The New York Times.
Përpara pushtimit rus të Ukrainës, BE-ja kishte kërkuar mënyra për të reduktuar varësinë e saj nga karburantet fosile ruse, duke përfshirë qymyrin dhe naftën, por veçanërisht gazin.
Gati 40 për qind e totalit të gazit natyror të bllokut vinte nga Rusia. Por, që kur Moska urdhëroi tanke në Ukrainë më 24 shkurt, vendet anëtare kanë kërkuar më aktivisht mënyra për të ulur nevojat e tyre për gaz.
“Nëse ne mund ta bëjmë atë, edhe pjesa tjetër e Evropës mund ta bëjë”, tha Gitanas Nauseda, presidenti i Lituanisë, në Twitter të shtunën.
Ndërsa, Lituania është një vend i vogël me vetëm 2.8 milionë banorë dhe një ekonomi më e varur nga tregtia sesa industria, ajo është ekonomia më e madhe në shtetet baltike dhe gjithashtu anëtare e eurozonës.
Pra, ndërsa humbja e Lituanisë si klient nuk ka gjasa të dëmtojë ndjeshëm Gazprom, grupin shtetëror të energjisë në Rusi, masa ka një rëndësi gjeopolitike në krijimin e një precedenti për BE-në.
