Ish-kryeministri i Kosovës, Avdullah Hoti, ka thënë se qeveria e Albin Kurtit nuk e ka ndarë asnjë të hollë për dëmet që janë shkaktuar nga vërshimet e fundit që ishin në vend.
Ai, me anë të një postimi në rrjetin social Facebook, ka komentuar mbledhjen e sotme të qeverisë, duke kritikuar se nuk është marrë asnjë vendim për kompensim të dëmeve ndaj familjeve në Skenderaj, Klinë, Istog, Mitrovicë e komuna të tjera.
“Ftoj qeverinë t’u ndajë këtyre familjeve menjëherë një shumë fikse për gjërat elementare të jetës: shporet, frigorifer, shtrat, tepihë dhe ushqime bazike. Disa familje kanë humbur edhe rrobat e trupit. Ka familje me të moshuar e fëmijë shumë të vegjël, të cilët nuk mund të kthehen në shtëpitë e vërshuara pa u meremetuar plotësisht”.
“Asnjë meremetim nuk mund të bëhet në këto kushte atmosferike. Ka kohë për vlerësim të detajuar të dëmeve, si në ekonomitë shtëpiake, ashtu edhe në biznese e bujqësi”, ka shkruar Hoti. /Klankosova.tv/
