Gratë në Berlin tani mund të notojnë toples në pishinat publike të qytetit nëse dëshirojnë – ashtu siç munden meshkujt.
Përveçse u përshëndet si një hap përpara për barazinë gjinore në kryeqytetin gjerman, masa e prezantuar këtë javë është simptomatike e dashurisë së Gjermanisë për Freikoerperkultur – e përkthyer fjalë për fjalë si “kulturë e trupit të lirë” – e cila i ka rrënjët në fund të shekullit të 19-të, përcjell klankosova.tv.
Autoritetet e Berlinit morën masa pasi një notare tha se ajo ishte penguar të frekuentonte një nga pishinat e qytetit pa mbuluar gjoksin në dhjetor 2022.
Gruaja paraqiti një ankesë në zyrën e ombudspersonit të qytetit në Departamentin e Senatit për Drejtësi, Diversitet dhe Kundër Diskriminimit.
Autoritetet ranë dakord që gruaja kishte qenë viktimë e diskriminimit dhe këtë javë thanë se të gjithë vizitorët në pishinat e Berlinit, duke përfshirë gratë dhe ata që identifikohen si jobinare, lejohen të shkojnë topless.
Ajo pason një incident të ngjashëm në një park ujor në Berlin në verën e vitit 2021. Gruaja franceze Gabrielle Lebreton kërkoi kompensim financiar nga qyteti pasi rojet e sigurisë e urdhëruan të largohej nga lokali kur ajo refuzoi të mbulonte gjoksin.
Ajo ishte me djalin e saj pesëvjeçar kur ndodhi ngjarja. Duke folur për gazetën gjermane Die Zeit në atë kohë se pse ajo besonte se ishte diskriminim gjinor, ajo tha: “Për mua – dhe unë ia mësoj këtë djalit tim – jo, nuk ka një ndryshim të tillë. Si për burrat ashtu edhe për gratë, gjoksi është një karakteristikë dytësore seksuale, por burrat kanë lirinë të heqin rrobat e tyre kur është vapë dhe gratë jo’’.
