Kryeministri Albin Kurti, ka folur për iniciativën për tërheqjen e 30 përqind të mjeteve nga Trusti nga deputeti i PDK-së, Bekim Haxhiu, duke thënë se ky është niveli i profesionalizmit, i seriozitetit dhe i përgjegjësisë.
“Është shumë gabim, që edhe këta10 përqind që do të ishin përfituesit kryesor të një skeme për rrënimin e Trustit pensional të vendit, të udhëheqin me iniciativa të tilla. Janë këta që e kanë sjellë këtë propozim në Kuvend, dhe janë këta që po e keqpërdorin brutalisht edhe rrjetin medial për të manipuluar opinionin, si për përmasat e krizës, ashtu edhe për domosdoshmërinë e tërheqjes së mjeteve të Trustit si zgjidhje”, tha Kurti para foltores së Kuvendit.
“Ata po manipulojnë me konceptin e varfërisë ku nuk bëjnë pjesë vetë, dhe me qytetarët e vendit, për të arritur qëllimet e tyre personale, që nuk janë të qytetarëve në vend”, u shpreh kryeministri.
“Ja pra kush po merret me financa e me makroekonomi te ne. Është diletantizëm i jashtëzakonshëm, por pasojat nuk kemi pse i bartim ne, përveç se vetë ai person, pra sipas tij, fakti që një fond ekziston, shërben si një argument i mjaftueshëm dhe ftesë e hapur për ta zbrazur atë fond”, tha Kurti për deputetin Bekim Haxhiu.
“Dikush që sot me kaq lehtësi kërkon tërheqjen e 30 përqind të mjeteve të trustit, të jeni të bindur që nesër do ta ketë shumë të lehtë të votojë që nesër të kalojnë në pronësi publike për tender asfalti. Janë të njëjtit që na kanë sjellë në këtë gjendje, e të cilët po dëshirojnë që edhe pak të mira që ekzistojnë t’i rrënojnë”.
Në fund, Kurti tha se nuk e ka ditur se Haxhiu, të cilit nuk ia përmendi emrin, por iu referua vetëm si deputet i opozitës, është doktor shkence, transmeton Klankosova.tv.“Nuk e kam ditur se nismëtari i kësaj është doktor shkence, pra ka PhD, ka doktoraturë, dhe unë besoj se kjo nismë ka ardhur sepse nismëtari ka doktoraturë, po të mos kishte doktoraturë nuk do ta bënte këtë nismë” vetëm një doktoraturë në fizioterapi ta sjellë vetëbesimin që të bësh këso lloj propozimesh në ekonomi e financa të vendit”, tha Kurti.
